الشمس طلعت
الشمس طلعت نَوّرت كل البلاد
حَرَقت عيدان القش
فوق سطح البيوت
وبلدنا لسه الضلمة وخدَاها بعناد
ومغمية عينيها
وساقياها السكوت
.......................................
تعبت من الضلمة السوَاقي والغيطان
صَرَخت بلدنا
بس الصَرخة مكتومة
قومْ يا ابني لم الغلّة من قبل الآوان
الخلق تعبت ,
قوم ! الخَلْق محرومة
.......................................
والنيل على جدور الشجر كأنه بيتعكز
زي اللي شايل حجر
وانهد من شيله
مع إن عمره شباب ولا عمره يوم عجّز
كِتِرت عليه الهموم
هدِت قوام حيله
.......................................
يا حلم أيّامنا اللي راحت
واللي جايّة
كام روح بتزهق وكام نهار
بيفوت
واقفين على الشط
وانت بتِضوي في المَيّة
واللي بينزل في الغريق
بيموت
.......................................
دايرة السَوَاقي , والزمان دوّار
وتعبنا واحنا
في أوّل المشوار
جانا ربيع بالطبل والمِزمار
لا اخضر عود
ولا فتّحت أزهار !
مين اللي سَرق الفرح
من غناوينا
مين اللي زوّد جَرْح
في المَوّال ؟!
وسقانا كاس الهَم طول ليالينا
خلّانا واحنا شباب
في أسْوأ حال !
.......................................
نِفسي اغمض يوم وافتّح ألقى عيد
واشوف ما بينّا حبال الود
ممدودة
تصْحى بلدنا الصبح لابسة توب جديد
أبيض كضي الشمس
ما فيهوش نقطة سودة
.......................................
يا بلدنا قومي وافتحي الأبواب !
يمكن نلاقي نهارنا بعد غياب
الشمس نورها دق ع الأعتاب
خايف ما تصحيش إلا واحنا تراب !
ليست هناك تعليقات:
إرسال تعليق