نفسي اشوف النيل بيضحك
نفسي أغمّض يوم عينيا
واما افتّح
ألقى مصر حبيبتي جايّة
زي ما اتعوّدت اشوفها
من سنين
نفسي اشوف النيل بيضحك
ضحكته الحلوة البهية
نفسي اشوفه وهو فرحان
مش حزين
واما اطل على الوشوش
ألقى وش الناس بشوش
والشوارع تاني ..
تملاها المحبة والمودة
يبقى كل الناس ملايكة
و فرحانين
نفسي تاني ..
تطرح الأرض اللي
ماتت
من سنين
زرع أخضر مروي من
عرق الغلابة الطيبين
نفسي تاني ..
أمشي على الكورنيش
في عز الليل ألاقي
الخلق سهرانة
على ضي القمر
أنسى همي و اعيش
في حلم جميل
والاقي الدنيا فرحانة
فيحلى لي السهر !
نفسي اشوف النيل بيضحك
ضحكته الحلوة البهية
نفسي اشوفه وهو فرحان
مش حزين !
كلمات / متولي بصل
ليست هناك تعليقات:
إرسال تعليق